The Broker · R1 Market Insight
What to focus on when buying property in Egypt
حاجات تركز عليها وانت بتشتري
– تاريخ المطور و سجلّه في التسليمات = بيسلم متأخر لحد سنه مقبول ، أكثر من كده شوف غيره ، مش بيسلم خالص إهرب بسرعه.
– شوف مشروع يكون مش جديد تماما. يعني ، شوف مرحله في مشروع قائم بالفعل او تم بيع مراحل قبل كده فيه = هيوفَّر عليك وقت و فلوس كثييير جدا. و صعبانيات غيرك عدى بيها خلاص من مرافق للاندسكيب لشوارع لدليفري و خدمات. حتى لو مش على مستوى المرحله بس على الاقل على مستوى المشروع كله بالذات لو مشروع كبير. و فكرة = إلحق بسعر افتتاح المشروع = مش فارقه كثير الاسعار مش فايتك حاجه.
– لو بتشتري ريسيل = دور على حاجه قبل ٢٠٢٤ لان من ٢٠٢٤ لغاية دلوقتي المطورين بيلفوا حوالين نفس الاسعار وحوالين نفسهم كمان عشان يبيعوا و مش عارفين.
– ما تفرحش بالاسعار في المطورين الصغيرين لازم تشوف بعينك خدمة ما بعد البيع و الصيانه عندهم شكلها ايه لان في اوقات كثير بيبقى الغالي ثمنه فيه. و أسعار المطورين الصغيرين حاليا أصلا مش فارقه كثير عن الكبار.
– مفيش حاجه اسمها المطور تمام يبقى اشتري معاه = المطور تمام في أنهي مشروع ؟ مطورين كبار زي ماونتن فيو مثلا وغيرهم الفروقات كبيره بين مشاريعهم.
– دوَّر على بروكر شاطر شايف و فاهم السوق هيفيدك كثير جدا. فكرة انك هتشوف بنفسك = ده مش مجالك و ياما غيرك شافوا و لبسوا في الحائط بلاش تلبس في الحائط.
– معظم الشركات اللي هتديك نسب خصم عاليه = بتتأخر في التسليم. والعكس صحيح.
– الاستلام بدري = زيادة في قيمة الاستثمار أسرع. عشان كده اختيارك بتشتري ايه يفرق جامد جدا في فلوسك بتزيد قد ايه في وقت قد ايه مش كل العقارات واحد.
– الشقق الفندقيه حلوه و بتكسب و هنأجرها بفلوس كثير ؟ فكر تاني. كلامك صح لكن فيه ثوره في الشقق الفندقيه حاليا و خلال سنتين ثلاثه هيبقى فيه وفره شديده من الشقق الفندقيه و هو اصلا حاليا الشقه المفروشه غرفه و صاله بتتاجر في مدينتي ب ١٥٠٠ في اليوم حصل خير.
– اشتري في الساحل ؟ لطيف طبعا و صعب جدا يخسر بس حاول تبعد عن المشاريع العملاقه اللي فيها الاف الوحدات. و زي ما اتكلمنا قبل كده دور على الحقيقه : القرب من البحر ، ارتفاع العماره ، عرض الشاطىء ، الخدمات.
مع كل التمنيات بدوام النجاح ،
يورز ترولي ،
رامي حجاج
Originally shared on The Broker WhatsApp Channel.