The Broker · R1 Market Insight

How to separate real-estate sales claims from the facts

اوعى تشتري هناك – عرض مش هيتكرر – دي ااااخر وحده الحق بقا انت حر – سعر الافتتاح – خصم مش هيتكرر

كلام كثير في السوق ، هل يعقل ان كل ما اسال على مشروع يبقوا بيبيعوا اخر وحده ؟ اكيد لا طبعا زي ما هو لا يعقل انك كل ما تدخل سيتي ستارز او كايرو فيستيفال تلاقيهم عاملين sale. لكن، الفتره الاخيره الموضوع زاد. طول عمرنا عارفين الهبل بتاع استعمال طبيب و شقه لعظيم و فيلا لهواة الفخامه. مين هما هواة الفخامه ؟ و هواة الشقق الايجار. لكن حاليا ، مفيش شقه بتتعرض غير هي الافضل على الاطلاق و السعر نازل بسبب سرعة البيع و السفر. و لما بتروح تقابل حد من المبيعات معظم الوقت بيحاول يقنعك مستخدم كل الجمل اللي فاتت مطعمه ببعض المصطلحات بالانجليزي هو حافظها بالعافيه و بينطقها غلط طبعا ان لو ما اشترتش دلوقتي هيفوتك قطر الحياه كله و هتندم و تخسر دنيتك و اخرتك.

السؤال هنا : هل أصبحت العقارات شغلانة اللي مالوش شغلانه؟ و أنا لو عايز اشتري أعرف منين ان اللي بيتقال لي ده حقيقه ؟

العقارات الفتره الأخيره لانها شغلانه فيها فلوس فدخل فيها ناس كثير مؤخرا. و زي مجالات كثير مافيهاش نظام واضح فالدنيا في اللاخر راجعه ليك انت كعميل بيشتري انك تعمل الواجب اللي عليك و تشتري صح يا اما بصراحه = هتزعل.

الموضوع في العقارات فيه حاجات مش واضحه و تحتمل 4 معاني مش معنيين زي نسبة التحميل و فترة سماح في التسليم و كلام عايم كثير لكن النهارده انا باتكلم على الأشخاص نفسهم اللي شغالين في مبيعات العقارات. انت كعميل ، محتاج من شخص المبيعات ده يبقى صادق و شاطر في شغله و دريان بالسوق.هل ده موجود ؟ أكيد لكن الحقيقه ، مش كثير خالص. لو بنتكلم على مبيعات البيع المباشر اللي هو مبيعات المطوّر نفسه فانت لو عديت في يوم على 10 مطوّرين مختلفين كل واحد فيهم هيحلفلك ان هو الأفضل وهو الأحسن. ولو بتتكلم مع بروكر فهتلاقيه بيزقّك على المشروع اللي بياخد فيه عموله أكبر. أنا الفتره اللي فاتت شفت مصطلحات في السوق من المبيعات زي مثلا : "اضربله المشروع" = معناها انه يخوّف العميل من مشروع معيّن غالبا بيكون بسبب ان العميل لو اشترى في المشروع ده هيشتري مع حد مبيعات تاني غير اللي "بيضربله المشروع". فيقوم يضربله المشروع عشان يشتري معاه هو في مشروع تاني و يكسب عموله. المشروع افضل للعميل او اسوأ مش مهم، مناسب او مش مناسب مش مهم. و هو نفس الشخص اللي بيضرب في المشروع ده بيبيع فيه برضه بس لعميل تاني عادي. مصطلح تاني مثلا : أهاندل العميل = يعني أريحه و اسكته. طب ما لو عنده اعتراضات منطقيه ما انا المفروض اتكلم معاه كانسان عادي؟ لا ما بيحصلش المبيعات دلوقتي بيعتبر ان طالما هو مبيعات لا عادي كل ده عادي مش نصب و كذب و خيانة أمانه لا دي اسمها = شطاره. انا كده سيلز شاطر كل ما سبق يدخل تحت خانة الشطاره. و تلاقي الشخص بيصلي الفرض بفرضه و يخلص صلاه السلام عليكم ورحمة الله و فورا يبدأ يهاندل و يشيّل و يضرب و يكمل يوم الشغل الطبيعي بتاعه ولا اي حاجه.

طب انت كعميل تعمل ايه عشان توصل للحقيقه في ظل الغابه دي؟ أولا حاول توصل لحد كويّس في المجال يكون ثقه و شاطر يفيدك. زي ما فيه الوحش فيه كمان ناس شاطره و أمينه و بتىاعي ربنا و مش "بتضرب" ولا بت"هاندل" موجودين في السوق. و زي أي حاجه ابحث بنفسك اونلاين دلوقتي فيه ريفيوهات اونلاين عن المشاريع. اشتري من شركه كبيره عشان تقلل المخاطره و حتى الشركات الكبيره لازم تسأل عن المشروع المحدد اللي انت بتشتري فيه. راجع البوست اللي قبل ده عن حاجات تهمك تسأل فيها قبل ما تشتري. كمان وانت قاعد مع مبيعات المطور اطلب منّه انك تشوف بعينك حاجه موجوده و تدخلها. احسب الأمتار المكتوبه بنفسك في الlayout ما تاخدش اي حاجه مسلّم بيها. اسال عن درافت العقد و اقراه بعنايه. و ربنا يسهل و ما تتهاندلش باذن الله.

رامي حجاج

Originally shared on The Broker WhatsApp Channel.